جونو سيارہ مشتري کي جانب روانہ

امريکي خلائي ادارے ناسا نے سيارہ مشتري کي جانب ايک ارب دس کروڈ ڈالر ماليت کا ايک ايسا خلائي مشن روانہ کيا ہے جس پر کوئي انسان سوار نہيں-

جونو نامي يہ خلائي جہاز مريخ کے پاس سے گزرتا ہوا سنہ 2016 ميں مشتري کے مدار ميں داخل ہوگا- يہ شمسي توانائي سے چلنے والا پہلا خلائي مشن ہے جسے سورج سے اتنا دور بھيجا گيا ہے-

اس خلائي جہاز کو اٹلس فائيو راکٹ کي مدد سے فلوريڈا کے کيپ کنيورل مرکز سے روانہ کيا گيا ہے اور اس کا مشن نظامِ شمسي کے سب سے بڑے سيارے کي پيدائش اور ارتقاء پر تحقيق کرنا ہے-

خلائي جہاز جونو کي روانگي کے موقع پر ناسا کے ايڈمنسٹريٹر چارلس بولڈن کا کہنا تھا کہ ’آج جونو خلائي جہاز کي روانگي کے ساتھ ہم نے ايک اور نئي سرحد کي جانب سفر شروع کر ديا ہے‘-

اس مشن کے دوران سائنسدان مشتري کے ماحول ميں وافر پاني کي موجودگي کا پتہ چلانے کي کوشش بھي کريں گے جو اس بات کي نشاني ہے کہ جب مشتري بنا تو نظامِ شمسي کے اس علاقے ميں کتني آکسيجن موجود تھي-

سيارہ مشتري کے پاس جہاں سورج کي روشني کي شدت زمين کے مقابلے ميں 1/25 ہے، خلائي مشن کو عموماً توانائي کے ليے پلوٹونيم بيٹريوں پر انحصار کرنا چاہيے ليکن جونو پر تين ايسے پر نصب ہيں جن پر اٹھارہ ہزار شمسي سيل لگائے گئے ہيں-

اس مشن کے چيف سائنسدان سکاٹ بولٹن نے بي بي سي کو بتايا کہ ’ايک شمسي پينل والا مشن ہونے کے ناتے ہميں ان پينلز کا رخ سورج کي جانب رکھنا ہوگا اور ہم کبھي بھي مشتري کے سائے ميں نہيں جائيں گے‘-

جونو يہ بھي پتہ چلانے کي کوشش کرے گا کہ مشتري کي مرکزي تہہ چٹاني ہے يا گيسوں سے بني ہوئي ہے- اس کے علاوہ وہ مائع دھاتي ہائيڈروجن کے اس سمندر کو بھي تلاش کرے گا جسے سيارے کے طاقتور مقناطيسي ميدان کي وجہ قرار ديا جاتا ہے-

جونو ناسا کا دوسرا نيو فرنٹيئر کلاس مشن ہے- نيو ہورائزنز نامي پہلا مشن سنہ 2006 ميں پلوٹو کي جانب روانہ کيا گيا تھا اور وہ سنہ 2015 ميں اپني منزلِ مقصود پر پہنچے گا-