کۆبوونەوەی سەرانی ڕێکخراوی هاریکاریی ئیسلامی کۆتایی بە کارەکانی هێنا
کۆبوونەوەی سەرانی ڕێکخراوی هاریکاریی ئیسلامی لە ئەستەمۆڵ بە دەرکردنی بەیاننامەیەک دا کۆتایی بە کارەکانی هێنا .
بە گوێرەی ڕاپۆرتی ئیرنا ، ڕەجەب تەیب ئەردۆغان ی سەرۆک کۆماری تورکیا کە سەرۆکایەتیی کۆبوونەوەکەشی لە ئەستۆ بوو ، لە گوتاری کۆتایی کۆبوونەوەکەدا کوتی : ئەو کۆبوونەوەیە بە دروشمی هاودەنگی و یارمەتی بۆ هاوکاریی زۆرتری ئەندامەکانی بەڕێوە چوو .
ناوبراو کوتیشی : ڕێکخراوی هاوکاریی ئیسلامی لە تەنیشت فەلەستینە و لە بواری سیاسی و ئابوورییەوە داکۆکی لە فەلەستینییەکان دەکات .
سەرۆک کۆماری تورکیا بەبێ ئەوەی بڕگەکانی ڕاگەیەندراوی کۆتایی بخوێنێتەوە کوتیشی کە بڕیارەکانی ئەو کۆبوونەوەیە هیوای بەخشیوەتە گەلانی موسوڵمان بۆ پێشکەوتن و خۆش بژی و دادگەری و ئاشتی .
ناوبراو کوتیشی : بۆ جێگیر کردنی دادگەری و بۆ پێشگرتن لە ستەم هەوڵ دەدەین .
بە گوێرەی ڕاپۆرتەکان سەرۆک کۆماری وڵاتەکەمان و شاندی هاوڕێی ، سەرلە ئێوارێی ئەمڕۆ هەینی بۆ درێژە دان بە دانوستانی دوو لایەنە لەگەڵ کاربەدەستانی پایەبەرزی تورکیا لە ئەستەمۆڵەوە دەڕواتە ئانکارا ی پێتەختی تورکیا .
دوکتۆر ڕەوحانی دوێنێ لە گوتاردەرانی سەرەکیی کۆبوونەوەی سەرانی وڵاتانی ئیسلامی بوو ، کە زۆرترلە 30 وڵات لە ئاستی سەرۆک کۆمار و سەرۆکی دەوڵەت تێیدا بەشدار بوون .
هاوکات لەگەڵ ئەو کۆبوونەوەیە ، سەرۆکایەتیی دەورەیی ڕێکخراوی هاریکاریی ئیسلامی بۆ خولێکی سێ ساڵان لە میسرەوە درایە تورکیا .
سەرۆکی کۆماری ئیسلامیی ئێران لە پەراوێزی ئەو کۆبوونەوە دوو ڕۆژەیە ، چاوپێکەوتنی دوو لایەنەی لەگەڵ سەرانی وڵاتانی ئیسلامی ئەنجام دا و شەوی ڕابردوو لە کۆڕی گروپێک لە ئێرانییەکان و بلیمەتان و بازرگانانی ئێرانی دانیشتووی ئەستەمۆڵ دا ئامادە بوو .
