• صارفین کی تعداد :
  • 2549
  • 4/13/2013
  • تاريخ :

اردو ادب آپ بيتي سے تہي دامن  نہيں

آپ بیتی

آپ بیتی

آپ بيتي کي مختلف شکليں

ايک مورخ آپ بيتي کے ذريعے ايک خاص ماحول کو زيادہ بہتر طور پر سمجھ سکتا ہے

انگريزي ادب ميں آپ بيتيوں کا ايک وسيع ذخيرہ موجود ہے- اردو ادب آپ بيتي سے تہي دامن تو نہيں مگر اچھي آپ بيتيوں کي تعداد کچھ زيادہ نہيں- آپ بيتي کے ذخيرے ميں کمي کي سب سے بڑي وجہ غالباً مشرق کا روايتي انکسار ہے وہ لوگ بھي جو زندگي ميں في الواقع بعض اہم کارنامے انجام ديتے ہيں، آپ بيتي لکھنے سے محض اس لئے باز رہتے ہيں کہ اس ميں خودستائشي کا پہلو نکلتا ہے- تاہم دور حاضر ميں آپ بيتي کي طرف کچھ توجہ کي جانے لگي ہے اور بعض بلندپايہ آپ بيتياں منظر عام پر آچکي ہيں-

نسبتاً معروف، نماياں اور مفصّل آپ بيتيوں کے نام يہ ہيں:

مولانا محمد جعفر تھانيسري/ تواريخ عجيب عرف کالا پاني

ظہير دہلوي/ داستان غدر

حسرت موہاني/ قيد فرنگ

چودھري افضل حق/ ميرا افسانہ

ابوالکلام آزاد/ تذکرہ

رضا علي/ نامہ اعمال

حکيم احمد شجاع/ خوں بہا

مولانا عبدالرزاق کانپوري/ ياد ايام

مرزا فرحت اللہ بيگ/ ياد ايام عشرت فاني

سيد ہمايوں مرزا/ ميري کہاني ميري زباني

عبدالمجيد سالک/ سرگزشت

شاد عظيم آبادي/ شاد کي کہاني شاد کي زباني

رشيد احمد صديقي/ شفتہ بياني ميري

ديوان سنگھ مفتون/ ناقابل فراموش

ڈاکٹر يوسف حسين خان/ يادوں کي دنيا

ملا واحدي/ ميرے زمانے کي دلّي

مولانا حسين احمد مدني/ نقش حيات

جوش مليح آبادي/ يادوں کي برات

سر ظفراللہ خاں/ تحديث نعمت

احسان دانش/جہان دانش 1973

کليم الدين احمد/ پني تلاش ميں

گوپال متّل/ لاہور کا جو ذکر کيا

مشتاق احمد خاں/ کاروان حيات

مرزا ظفرالحسن خاں/ ذکر يار چلے

سبط حسن/شہر نگاراں

شورش کاشميري/ بوئے گل نالہ دل دود چراغ محفل- پس ديوار زندان

جوش اور احسان دانش کي آپ بيتياں ادبي اعتبار سے بلند ہيں- اور دلچسپي کے نقطہ نظر سے ديوان سنگھ مفتون کي آپ بيتي بہترين ہے- جوش کے ہاں بناوٹ، مبالغے اور رياکاري کي مثاليں ملتي ہيں- جب کہ احسان دانش نے بڑے بےلاگ طريقے سے اپني زندگي کي تفصيلات پيش کي ہيں- "تذکرہ زنداں" (پروفيسر خورشيد احمد) اور "ہمہ ياراں دوزخ" (صديق سالک) ايام اسيري کي روداديں ہيں-

ان مستقل آپ بيتيوں کے علاوہ مختلف رسائل و جرائد ميں متعدد مشاہير کي طويل اور مختصر آپ بيتياں شائع ہوتي رہي ہيں- ان ميں سے بيشتر کئي کئي اقساط ميں چھپنے کےباوجود نامکمل ہيں- اس سلسلے ميں فضل احمد کريم، ملک نصراللہ خاں عزيز، شان الحق حقي، زيڈاے سلہري، قدرت اللہ شہاب، ضمير جعفري اور الطاف گوہر کي آپ بيتياں قابل ذکر ہيں-

ڈاکٹر سيد عبداللہ کي آپ بيتي "افکار" ميں بالاقساط چھپ چکي ہے- "نقوش" کا آپ بيتي نمبر مختلف اور متفرق آپ بيتيوں کا خوبصورت اور ضخيم مرقع ہے- "مٹي کا ديا" ميرزا اديب کي آپ بيتي ہے-

آپ بيتي کي ايک شکل وہ ہوتي ہے جسے غيرانساني آپ بيتي کا نام ديا جا سکتا ہے- اس ميں مختلف پرندوں، جانوروں، درختوں، پودوں اور بےجان اشياء غرض انسان کے علاوہ ہر ذي روح، نباتات اور جمادات وغيرہ کي آپ بيتياں شامل ہيں-