اگر میت کا وارث صرف ایک دادا اور ایک دادی ہو وہ پدری ہو یامادری تو تمام مال اسی کو ملے گا البتہ میت کے دادا کی موجودگی میں پر دادا کو ارث نہیں ملے گا۔

اگر میت کے وارث صرف دادا دادی ہوں تو مال تین حصوں میں تقسیم ہوگا۔ دو حصے دادا کو اور ایک حصہ دادی کو ملے گا اور اگر نانا، نانی ہوں تو مال ان کے درمیان مساوی طور پر تقسیم ہوگا۔

اگر میت کا وارث صرف دادا یا دادی اور نانایا نانی ہو تو مال تین حصوں میں تقسیم ہوگا۔ دو حصے دادا یا دادی کو اور ایک حصہ نانا یا نانی کو ملے گا۔

اگر میت کا وارث دادا، دادی اور نانا، نانی ہوں تو مال تین حصوں میں تقسیم ہوگا۔ ایک حصہ نانا، نانی کو ملے گا جو مساوی طور پر اپنے درمیان تقسیم کرلیں گے اور دو حصے دادا دادی کو ملیں گے لیکن دادا دادی کے دو برابر لے گا۔

اگر میت کا وارث صرف اس کی بیوی، دادا، دادی، نانا، نانی ہوں تو بیوی اس تفصیل کے ساتھ ارث لے گی جو بیان کیا جائے گا اور اصل مال کے تین حصوں میں سے ایک حصہ نانا، نانی کو ملے گا جو آپس میں برابر تقسیم کرلیں گے اور بقیہ دادا دادی کو دیا جائے گا اور دادا دادی کے دو برابر لے گا اور اگر میت کا وارث شوہر اور دادا دادی اور نانا نانی ہوں تو شوہر کو مال کا آدھا اور باقیوں کو اس دستور کے مطابق جو گزشتہ مسائل میں بیان کیا گیا ہے میراث ملے گا۔