سری لنکا نے بھارت کو ہرا دیا 

  دلشان نے انسٹھ گیندوں پر ناقابل شکست باسٹھ رنز بنائے.

آسٹریلیا میں جاری سہ ملکی ایک روزہ بین الاقوامی میچوں کی کامن ویلتھ بنک سیریز کے بارش سے متاثرہ پانچویں میچ میں سری لنکا نے بھارت کو ڈکورتھ لوئیس قانون کے تحت آٹھ وکٹوں سے شکست دے دی ہے۔

بھارت نے پہلے کھیلتے ہوئے انتیس اوورز میں پانچ کھلاڑیوں کے نقصان پر ایک سو پچانوے رنز بنائے تھے۔ روہت شرما پینسٹھ گیندوں پر ستر رنز بنا کر بھارت کی طرف ٹاپ سکورر رہے۔

گوتم گھمبیر خطرناک موڈ میں دکھائی دے رہے تھے لیکن جب ان کا سکور پینتیس رنز ہوا تو وہ رن آؤٹ ہوگئے۔

جواب میں سری لنکا کو ڈکورتھ لوئیس قانون کے تحت تیئس اوورز میں ایک سو پچانوے رنز کا ہدف دیا گیا، جو اس نے دو کھلاڑیوں کے نقصان پر اکیس اوورز میں پورا کر لیا۔ تلکا رتنے دلشان نے انسٹھ گیندوں پر ناقابل شکست باسٹھ رنز بنائے۔

دوسرے ناٹ آؤٹ بیٹسمین جے وردھنے تھے جنہوں نے پینتیس گیندوں پر چھتیس رنز بنائے۔